നവരാത്രി ഘോഷയാത്രയോടനുബന്ധിച്ച് വ്യാഴാഴ്ച രാവിലെ 11മുതൽ രാത്രി എട്ടുവരെ തിരുവനന്തപുരം നഗരത്തിൽ ഗതാഗതനിയന്ത്രണം ഏർപ്പെടുത്തി.പള്ളിച്ചൽമുതൽ ശ്രീപദ്മനാഭസ്വാമി ക്ഷേത്രംവരെയുള്ള റോഡിലാണ് ഗതാഗതനിയന്ത്രണം. വലിയ വാഹനങ്ങൾ ഉൾപ്പെടെയുള്ള യാതൊരു വാഹനങ്ങളും നവരാത്രി ഘോഷയാത്ര കടന്നുപോകുന്ന റോഡുകളിൽ പാർക്ക് ചെയ്യാൻ പാടില്ല. ഇത്തരം വാഹനങ്ങളെ റിക്കവറി വാഹനം ഉപയോഗിച്ച് നീക്കംചെയ്യും.
നവരാത്രി വിഗ്രഹ ഘോഷയാത്ര കരമനയിൽ ആവടയമ്മൻ ക്ഷേത്രത്തിൽ എത്തുന്ന സമയം കരമന-കിള്ളിപ്പാലം റോഡിൽ ഗതാഗതം വഴിതിരിച്ചുവിടും. കരമനഭാഗത്തുനിന്ന് തമ്പാനൂർ ഭാഗത്തേക്കുള്ള വാഹനങ്ങൾ കൽപ്പാളയം-കുഞ്ചാലുംമൂട്-പൂജപ്പുര-ജഗതി-തൈക്കാട് വഴി പോകേണ്ടതാണ്. തമ്പാനൂർ ഭാഗത്തുനിന്ന് കരമന ഭാഗത്തേക്കുള്ള വാഹനങ്ങൾക്കു തടസ്സമില്ലാതെ പോകാം. പരാതികളും നിർദേശങ്ങളും അറിയിക്കാനുള്ള ഫോൺ: 0471-2558731, 9497930055.