കണ്ണൂര്‍. വിവാദമായ കാഫിർ സ്ക്രീൻ ഷോട്ട് സമൂഹമാധ്യമത്തിൽ പങ്കുവെച്ചയാൾ വീണ്ടും സി പി ഐ എം ബ്രാഞ്ച് സെക്രട്ടറി. അമ്പാടിമുക്ക്
സഖാക്കളെന്ന പേജിന്റെ അഡ്മിൻ കൂടിയായ കെ കെ മനീഷിനെയാണ് കണ്ണൂരിലെ വേളം സെന്റർ ബ്രാഞ്ച് സെക്രട്ടറിയായി തെരഞ്ഞെടുത്തത്. കാഫിർ സ്ക്രീൻഷോട്ട് മനീഷ് ഷെയർ ചെയ്തതായി അന്വേഷണത്തിൽ കണ്ടെത്തിയിരുന്നു.
വിവാദമായ കാഫിർ സ്ക്രീൻഷോട്ട് അമ്പാടിമുക്ക് സഖാക്കളെന്ന ഫേസ്ബുക്ക് പേജ് പങ്കുവെച്ചിരുന്നു. പേജ് അഡ്മിനായ മയ്യിൽ
സ്വദേശി കെ കെ മനീഷാണ് പോസ്റ്റ് ഷെയർ ചെയ്തതെന്ന് പോലീസ് കോടതിയിൽ സമർപ്പിച്ച അന്വേഷണ റിപ്പോർട്ടിലുണ്ട്. റെഡ് ബെറ്റാലിയൻ വാട്ട്സ്ആപ്പ് ഗ്രൂപ്പിൽ നിന്ന് ലഭിച്ച സ്ക്രീൻഷോട്ട് പങ്കുവെച്ചുവെന്നാണ് മനീഷ് പോലീസിന് നൽകിയ മൊഴി. ആധികാരികതയിൽ സംശയം തോന്നിയതിനാൽ പിന്നീട് നീക്കം ചെയ്തുവെന്നും മനീഷ് മൊഴി നൽകി. വടകരയിൽ യുഡിഎഫിനെതിരെ സിപിഎം തൊടുത്തുവിട്ട ആരോപണം ബൂമറാങായതോടെ വ്യാജ പോസ്റ്റ് ഷെയർ ചെയ്തത് തെറ്റെന്ന്‌ സി പി ഐ എം ജില്ലാ നേതൃത്വം പ്രതികരിച്ചിരുന്നു. പിന്നാലെയാണ് മനീഷിനെ വീണ്ടും സി പി ഐ എം ബ്രാഞ്ച് സെക്രട്ടറിയായി തെരഞ്ഞെടുത്തത്.