ചലച്ചിത്ര അക്കാദമി സംവിധായകൻ രഞ്ജിത്തിനെതിരെ മീ ടൂ ആരോപണം ഉയരുന്നതിനിടെ മമ്മൂട്ടി-രഞ്ജിത് കൂട്ടുകെട്ടിലെത്തിയ പാലേരി മാണിക്യം: ഒരു പാതിരാ കൊലപാതകത്തിൻ്റെ കഥ എന്ന ചിത്രം റീലീസിനൊരുങ്ങുന്നു. 4കെ, ഡോൾബി അറ്റ്‌മോസ് ദൃശ്യ-ശബ്ദ മിഴിവോടെയാണ് വീണ്ടും തിയറ്ററുകളിലെത്തുക. ഇതിന് മുന്നോടിയായി ചിത്രത്തിൻ്റെ ട്രെയ്‌ലർ ഇന്ന് വൈകിട്ട് 7ന് പുറത്തുവരും. ടി.പി. രാജീവൻ്റെ ഇതേ പേരിലുള്ള നോവലിനെ ആസ്പദമാക്കി രഞ്ജിത് ഒരുക്കിയ ചിത്രം 2009ലാണ് പുറത്തിറങ്ങിയത്.
ഹരിദാസ്, മുരിക്കിൻകുന്നത്ത് അഹമ്മദ് ഹാജി, ഖാലിദ് അഹമ്മദ് എന്നിങ്ങനെ മൂന്ന് വേഷങ്ങളിലാണ് മമ്മൂട്ടി ചിത്രത്തിൽ എത്തിയത്. മമ്മൂട്ടിക്ക് മികച്ച നടനുള്ള പുരസ്‌കാരവും ശ്വേത മേനോന് മികച്ച നടിക്കുള്ള പുരസ്‌കാരവും അടക്കം അത്തവണത്തെ സംസ്ഥാന ചലച്ചിത്ര അവാർഡിൽ നാല് അവാർഡുകളാണ് നേടിയത്.
മൈഥിലി, ശ്രീനിവാസൻ, സിദ്ദിഖ്, സുരേഷ് കൃഷ്ണ, മുഹമ്മദ് മുസ്തഫ, ശശി കലിംഗ, ടി ദാമോദരൻ, വിജയൻ വി നായർ, ഗൗരി മുഞ്ജൽ തുടങ്ങിയവരും ചിത്രത്തിലെ പ്രധാന വേഷത്തിലെത്തി.
